ပြည်ထောင်စုမြန်မာနိုင်ငံတွင်မှီတင်းနေထိုင်ကြ သောတိုင်းရင်းသားအားလုံးတွင်ကိုယ်ပိုင်စာပေ၊ကိုယ်ပိုင် ယဉ်ကျေးမှုနှင့်အတူ ဓလေ့ထုံးစံများသည် လူမျိုးတစ်မျိုး နှင့် တစ်မျိုး မတူကွဲပြားခြားနားနေသည်မှာ ချစ်စရာ၊ လေ့လာစရာ၊သိမှတ်စရာများပင်ဖြစ်ကြ ပေသည်။ နေ့အလိုက်(၁၂)လရာသီအလိုက် ထူးခြားဆန်းပြားသော ပွဲတော်များလည်းရှိကြသလို စဉ်လာမပျက် နှစ်စဉ်ကျင်းပသော ပွဲတော်များလည်းရှိကြပါသည်။

      သျှစ်သောင်းမြောက်ပွဲ (ခေါ်) သဲပုံစေတီပွဲကို သာကီ မဏ္ဍိုင် ရခိုင်ယဉ်ကျေးမှုအဖွဲ့ နာယက၊ ရခိုင်သုတသန ပညာရှင် ဆရာဦးအောင်လှသိန်းမှ ၂၀၀၁- ခုနှစ်တွင် စစ်တွေမြို့၊စစ်တွေဟိုတယ်ရှေ့ သဲသောင်ပြင်ကြီးတွင် စတင်ဖော်ထုတ်လုပ်ဆောင်နိုင်ခဲ့ပေသည်။ အစပထမနှစ် များတွင် လူသိနည်း၍ မျှော်မှန်းသလောက် စည်ကား  သိုက်မြိုက်မှု မရှိခဲ့သော်လည်း ၂၀၁၂-ခုနှစ် မှ စတင်ကာ သာကီမဏ္ဍိုင် ရခိုင်ယဉ်ကျေးမှုအဖွဲ့က ဦးဆောင်ကာ ရခိုင်ရိုးရာစဉ်လာမပျက် ကြီးကျယ်ခမ်းနား ရိုးရာပုံစုံဖြင့် ရခိုင်မင်္ဂလာစည်တော် တီးခတ်ယင်း-ရခိုင်ရိုးရာ ဝတ်စား ဆင်ယင်မှုများဖြင့် ထီး၊ တံခွန်၊ကုက္ကား၊ဆီးမီး၊နံ့သာထွန်း ညှိပူဇော်ကာသဲပုံစေတီပွဲကိုဆင်နွဲလာခဲ့ကြသည်။ သံဃာတော်များ ပင့်ဖိတ်ကာရေစက်ချ အမျှဝေ သာဓု အနုမောဒနာ တရားဟောကြားရင်း သျှစ်သောင်းမြောက် ပွဲကို ပြည်သူတစ်ရပ်လုံး စည်ကားသိုက်မြိုက်စွာ ရိုးရာ ဓလေ့ ပျော်မွေ့စွာ ကျင်းပလာခဲ့ကြပေသည်။

      မဏ္ဍိုင်စုရပ်သို့ရောက်သည်နှင့်တပြိုင်နက်အ သင့်ပါ လာသောပေါက်ပြား၊ ကော်ပြားများဖြင့် ရခိုင်လူငယ်များ ကသဲပြင်ကို တူးဆွကြသလို အမျိုးသမီးများမှာ စေတီ တည်မည့်နေရာသို့ နည်းအမျိုးမျိုးဖြင့် ပြောင်းရွှေ့စုပုံကြ သည်။ ၎င်းနည်းတူစစ်တွေမြို့ပေါ်ရှိ အဖွဲ့အစည်းများ၊ မိသားစုများအပါအဝင် ဒါနပြုကုသိုလ်ယူရန် လာရောက် ကြသော ကလေးသူငယ်လူကြီးပြည်သူများ ကလည်း တပိုင်တနိုင်စေတီတည်ကြသည်။ ဝါသနာရှင်၊ စေတနာ ရှင်၊ပညာရှင်များကလည်း စေတီပုံစံ အမျိုးမျိုးတည်ကြ သည်၊ နဂါးရုံ ဘုရား၊ သျှစ်သောင်းထုက္ကံသိမ်၊မဟာဗောဓိ၊ လျောင်းတော်မူဘုရား ၊ထိုင်တော်မူဘုရား၊ ဘုရားပုထိုး များ၊စေတီတောင်များ၊ပန်းကြာများနှင့် ရေကန်များ အပါ အဝင် ထူးခြားဆန်းကြယ်သော စေတီများကို အမြင့် ၂-ပေမှစ၍ ၅-ပေ အထိ တည်ကြသည်။ စေတီဘုရားများ တွင်လည်းပန်းတင်ခြင်း၊ဆီမီးနံ့သာထွန်းညှိပူဇော်ခြင်း၊ထီးတင်ခြင်း၊သာသနာ့အောင် လံလွှင့်ထူခြင်း၊ ကုက္ကား၊ တံခွန်များ ၊သာသနာ့အောင်လံများ စိုက်ထူခြင်းများ နှင့်ဒါနကုသိုလ်ယူကြသည်။ သဲများနှင့်စေတီတည်လင့်ကစား ပကတိစေတီကဲ့သို့ ဖူးမျှော်ကြည်ညိုကြ သည်မှာ ဗုဒ္ဓဘာသာဝင်ရခိုင်လူမျိုးများတို့၏ ထူးခြား သောဓလေ့စရိုက်ကို ပေါ်လွင်စေသည်မှာ အမှန်ပင်ဖြစ် သည်။