အရှေ့ပိုးကရင် အခေါ်အားဖြင့် “အောင်းတရာ မောင်း” ခေါ် မင်္ဂလာဆောင်ခြင်းသည် အရှေ့ပိုးကရင်တို့ အဖို့ အရေးကြီးဆုံး ပွဲကြီးတစ်ရပ်အဖြစ် သတ်မှတ်ကြသည်။ လက်ထပ်ထိမ်းမြားခြင်းအမှုသည် လူ့ဘဝတွင်အရေးကြီးဆုံး၊အသန့်ရှင်းဆုံးဖြစ်ရမည်ဟု သတ်မှတ်ထား ကြသည်ကို ဆိုလိုသည်။
ထို့ကြောင့်အရှေ့ပိုးကရင်တို့သည် လူနေမှုစနစ်တစ်ရပ်တွင်လက်ထပ်ထိမ်းမြားခြင်းမပြုမီ ကျူးလွန်ခြင်းမရှိရ။ ဖြူစင်သန့်ရှင်းရသည်။ အကယ်၍ ကျူးလွန် မိကြ သော် ကျေးရွာလူကြီးများက နေ့ဖက်တွင် ထိမ်းမြားခွင့် မပေးတော့ဘဲညဉ့်နက်အချိန်တွင်သာသတို့သားနှင့် သတို့သမီးတို့အား တိတ်တဆိတ်ထိမ်းမြားပေးကြသည်။ ထို ထိမ်းမြားပွဲမျိုးတွင်လူအများကမသွားဘဲ ရှောင်ရှားကြသည်။ အချိန်မတိုင်မီတွင် သစ္စာမရှိ ကျူးလွန်သူတို့အား ရှောင်ကြဉ်သည့် သဘောဖြစ်သည်။
အပျိုလူပျို တစ်ဦးနှင့်တစ်ဦးချစ်ရည်ငံ၍ မေတ္တာ မျှ ကြလျှင် လူကြီးများကိုအသိပေးကြသည်။ လူကြီးမိဘ များကို အသိပေးရန်မဝံ့မရဲဖြစ်လျှင် အပျိုခေါင်း၊လူပျိုခေါင်းမှတဆင့် အသိပေးစေသည်။အချို့ကကရင်အခေါ် “ထိုးလိုင်ဖိုး” ခေါ် အောင် သွယ် ကိုလည်းတဆင့် အသိပေးကြသည်။
လူကြီးမိဘများကိုအသိပေးပြီးသောအခါ သားရှင် မိဘတို့က သမီးရှင်မိဘအား သွားရောက် စေ့စပ်ရလေသည်။ အချို့က အပျို လူပျိုခေါင်း၊ အချို့က အောင်သွယ်ကို စေလွှတ်၍ သွားရောက် စေ့စပ်ခြင်း လည်း ရှိ သည်။
အချို့သောဒေသတွင် အပျိုကလူပျိုကို လိုက်ပြေးခြင်း၊ရည်းစားလူပျိုကညအခါမိမိကချစ်ရည်ငံပြီးသောအပျိုခန်းထဲဝင်ရောက်ပြီးပြန်မထွက်ခြင်းလည်းရှိသည်။ အပျိုက လူပျိုနောက် လိုက်ပြေးလျှင် နံနက်မိုးသောက်အခါ လူပျိုမိဘများက မိန်းကလေး မိဘကို သွားရောက်ပြီးပြောကြားရသည်။လူပျိုကအပျိုအိပ်ခန်းသို့ဝင်ရောက် ပြီး ပြန်မသွားတော့လျှင် နံနက်မိုးသောက်သော အခါ မိန်းကလေးမိဘများက လူပျိုမိဘများကို သွားရောက် ပြောကြားရသည်။
ထိုသို့အပြန်အလှန်သွားရောက်ပြောကြားရာတွင် တိုက်ရိုက်ဆိုခြင်း မရှိဘဲ တစ်စုံတစ်ခုနှင့် ပမာပြ၍ ပြော တတ်သည်လည်းရှိသည်။ မိန်းကလေးရှင်က “ ညက သင့်အိမ်မှ နွားသိုးလေး တစ်ကောင် ကျွန်ုပ်ခြံထဲကို ဝင် ရောက်နေတယ်၊ ကျွန်ုပ်ကောင်းစွာ ချည်နှောင်ထား ပါတယ်၊သင်ပြန်ယူမလား”ဟုပြောလျှင် သား ယောကျ်ား ရှင်က“ကျွန်ုပ်ပြန်မယူပါ၊ သင်သာ ကောင်းစွာထိန်း ကျောင်း ထားပါ” ဟူ၍ ပြန်ပြောလေသည်။ ထိုနည်းတူ သားယောကျ်ားရှင် သွားရောက်ပြောကြား လျှင် “ညတုန်းက သင့်အိမ်က နွားမတမ်းကလေး ကျွန်ုပ် နွားသိုးနောက်ကို လိုက်လာ၍ ကျွန်ုပ်ခြံထဲမှာ ကောင်းစွာ ချည်ထားပါတယ်၊ သင်ပြန်ယူမလား” ဟုပြောလာလျှင် မိန်းကလေးရှင်က ကျွန်ုပ်ပြန်မယူပါ၊ သင်ကသာ ကောင်းစွာထိန်း ကျောင်းပါ” ဟူ၍ ပြန်ပြောလေသည်။ ဆိုလိုသည်မှာ သဘောတူ မတူ အတည် ပြုခြင်းရှိ မရှိကို ဓလေ့အရ စကားကတိတောင်းခြင်းဖြစ်သည်။
ထိုသို့ တစ်ဖက်နှင့်တစ်ဖက် စေ့စပ်ကြောင်းလမ်း ၍ဖြစ်စေ၊ နှစ်ဖက်အပြန် အလှန်သဘောတူ၍ ဖြစ်စေ ထိမ်းမြားမင်္ဂလာဆောင်ရန် နေ့ကောင်းနေ့မြတ်သတ်မှတ်ပြီးဆိုလျှင် လက်ချည်မင်္ဂလာ ကရင်အခေါ် (အောဟောက်ခိုင်စူး) ကို ပြုလုပ်ကြရလေသည်။
အရှေ့ပိုးကရင်လူမျိုးတို့သည် နှစ်ဖက်သဘောတူ စေ့စပ်ကြောင်းလမ်းခြင်း ပြုလုပ်ပြီးသောအခါ မင်္ဂလာ ကြေး တင်တောင်းခြင်းကို ပြုလေ့မရှိချေ။ ကြေးတင်တောင်းခြင်းသည် သတို့သမီးအား တန်ရာတန်ကြေးနှင့်ရောင်းစားရာရောက်သည်ဟုယူဆ၍ အထူး ရှောင်ကြဉ် ကြသည်။
မင်္ဂလာအခမ်းအနားနှင့် ဧည့်ခံပွဲကို သတို့သမီးအိမ်တွင် ဦးစွာပြုလုပ်ရသည်။ နောင်အခါ ပြုလုပ် လိုပါ ကသတို့သားအိမ်တွင်တစ်ကြိမ်ပြုလုပ်နိုင်သည်။မင်္ဂလာအခမ်းအနားကုန်ကျစရိတ်ကိုအများအားဖြင့်နှစ်ဦးနှစ်ဖက်မျှခံကြသည်။ အချို့သော အနည်းစု အိမ်ထောင်စု တို့က မိသားစုအစဉ်အလာအရ သတို့သားဖက်ကသာ ကျခံရသော ဒေသဓလေ့ အချို့ ရှိသည်။ ဆင်းရဲနွမ်းပါးသူ ချင်းဖြစ်လျှင် ရပ်ရွာဆွေမျိုးတို့ ဝိုင်းဝန်းကူ၍ မင်္ဂလာကိစ္စကို ထောက်ပံ့ ပေးကြသည်။
မင်္ဂလာဆောင်ရန်နေ့ ရောက်သော နံနက်စောစော တွင် မင်္ဂလာသတို့သားက မိဘဆွေမျိုး အပေါင်းအသင်း များနှင့်အိုးစည် ဗုံမောင်းတံပိုး (ကျွဲချို)များမှုတ်၍ မင်္ဂလာ ဆောင်ရာ သတို့သမီး အိမ်သို့ သွားရောက်ကြလေသည်။ အချို့သောရပ်ဝေးနေသူ သတို့သားတို့က ကြိုတင်လာရောက်ပြီး သင့်ရာဆွေမျိုးအသိအိမ် သို့မဟုတ် လူပျိုခေါင်း၊ လူကြီးအိမ်များတွင် တည်းခိုအိပ်စက် ပြီး နံနက် စောစောတွင် သတို့သမီးအိမ် သို့ သွားရောက်ကြသည်။
မင်္ဂလာဆောင်ရန် သတို့သမီးအိမ်သို့သွားရောက် ရာတွင် သတို့သားကို လင်စုံမယားစုံနှစ်ဦးက ထီးမိုး ပေး ကြသည်။ မင်္ဂလာ ဆောင်ရန် အသုံးအဆောင်ပစ္စည်းများကိုလည်း မိဘအစုံရှိသည့် လူပျိုရံအပျိုရံများက ဝိုင်းဝန်းသယ်ဆောင်ပေးကြသည်။ သတို့သားအတွက် ပြုလုပ်ပေးမည့် လူပျိုရံကလည်းမိစုံဖစုံသာဖြစ်ရသည်။(ဤနေရာတွင် မိစုံဖစုံကိုရွေးချယ်ခြင်းမှာ မင်္ဂလာ ဆောင်မည့် သတို့သား၊ သတို့သမီး တို့အား သက်ဆုံးတိုင် ပေါင်း ဖက်နိုင်ရန် အတိတ် နိမိတ်ယူခြင်းဖြစ်သည်။)
သတို့သားနှင့်အတူပါလာသော အပေါင်းအဖော်တို့က မိမိတို့သတို့သားသည် ဆင်ပြောင်ကြီးကဲ့သို့ အင်အားပြည့်စုံသည့်သဘောဖြင့် သွားရာလမ်း တစ်လျှောက်တွင် သစ်ပင်ဝါးပင်များကိုနင်းခြေချိုးဖဲ့သွားကြသည်။ အိုးစည်ဗုံမောင်းအတီးအမှုတ်တို့ဖြင့်သီချင်းများကိုသံပြိုင် ဟစ်ဆိုရင်း သတို့သမီးအိမ်သို့ ရောက်သောအခါ အပျိုရံ များ က အိမ်ရှေ့တွင်တန်းစီလျက် ဆီးကြိုကြသည်။
ထိုသို့ မင်္ဂလာသတို့သား ရောက်လာသောအခါ နှစ်ဖက်သောအပျိုလူပျိုတို့က အတိုင်အဖောက် သီချင်း များဆိုကြသည်။ ကခုန်ပျော်မြူးကြသည်။ သတို့သားက ချက်ချင်းအိမ်ပေါ်သို့ တက်ခွင့်မပြုကြချေ။ သတို့သားမှာ ခွန်အားဗလရှိမရှိ စမ်းကြည့်သော သဘောဖြင့် ဝါးပိုး ရင့်ရင့် အရင့်ပိုင်း အမြစ်စိတ်စိတ် နှစ်ဆစ်ပိုင်းတစ်ပိုင်းကို သတို့သား အရှေ့သို့ပစ်ချထား ကြလေသည်။
ထိုအခါ သတို့သားလူပျိုရံတို့က အသင့်ဝှက်ယူ လာသောခါးကြားမှ ပေါက်ဆိန်ကို ထုတ်ပြီး သတို့သား အားပေးအပ်လေသည်။ သတို့သားက ပေါက်ဆိန်ဖြင့် နှစ်ချက်သုံးချက်ကွဲအောင် ပေါက်ခွဲရလေသည်။ ဝါးပိုး အဆစ်ပိုင်းကိုမခွဲမိဘဲဝါးပိုးသားကိုသာခွဲမိပါကပေါက်ဆိန် သွား တအားစိုက်နေပြီး နုတ်မရအောင် ဖြစ်နေတတ်သည်။ ထိုအခါမျိုးတွင် ပရိတ်သတ်များက ရယ်မော၍ လှောင်ပြောင်ကြလေသည်။ ဝါးဆစ်ပိုင်း ခွဲရာတွင် ကျွမ်း ကျင်လိမ္မာရသည်။ အချို့က နာရီဝက် တစ်နာရီကြာမျှ ရှိတတ်သည်။
သတို့သားက ဝါးဆစ်ပိုင်းခွဲနေချိန်တွင် လူပျိုရံများ က သီချင်းများကို အတိုင်အဖောက်ဖြင့် အော်ဟစ်သီဆို ကြလေသည်။
“ထွန်ဘားနအော ထိုးစီခွေ
ဖစ်လောင့်အော်လား သိုက်နော်ထွေ(လာလာဝေး)”
ငှက်တောက်ငှက်ပမာ စကားတတ်လှသော သင်တို့ထံ ရောက်ရှိ၍ လာပါပြီ၊
အရက်တစ်မော့တစ်ခွက် ပေးသောက်ကြပါလေ။
“ဂယ်ဘားနအော ထိုးစိစွန့်
ဖစ်လောင်အော်လား-သိုက်နော်ကွန်(လာလာဝေး)”
သင်တို့ထဲသို့ လာရောက်ရပါပြီ။ အရက် ယမကာ တစ်ပုလင်းလောက် ဧည့်ခံပါဟူ၍ သီချင်းဖြင့် တောင်းဆို ကြသည်။ သတို့သား ဝါးပိုးဆစ်ခွဲ၍ မကွဲသမျှ လူပျိုများ အရက်တောင်းသောက်ခြင်းကို ခွင့်မပေးကြချေ။ သတို့ သားက ဝါးပိုးဆစ်ခွဲ၍ ကွဲသောအခါ အိမ်ရှင်များက ဧည့် သည်များကိုအရက်ယမကာများဖြင့်ဧည့်ခံကြလေသည်။
အချို့က ရောက်လာသော သတို့သားကို အားစမ်း သောသဘောဖြင့်ကရင်ခေါ်“ထီတုံးထွန့်ကောက်”ရွှေ ကျည်တောက်ဖြင့်ပိတ်ဆို့တားဆီးကြသည်။ ဝါးကျည် တောက်တစ်လုံးကို ချောမွတ် နေအောင် သပ်ထားပြီး ဆီများဖြင့် သုတ်လိမ်းထားကြသည်။ တစ်ဖက်တွင် ကြိုး ဖြင့် နဖားကြိုးကဲ့သို့တပ်ဆင်ထားကြသည်။
ထိုအခါ အမျိုးသမီး အပျိုရံတို့က နဖားကြိုးကို ဆွဲ ထားပြီးချောမွတ်နေသောဝါးအဖျားပိုင်းကို အားစမ်းသည့် သဘောဖြင့်သတို့သားအားဆွဲစေသည်။ ကျည်ထောက်ကို ပါအောင်မဆွဲနိုင်သမျှ သတို့သားအား သတို့သမီးအိမ်ပေါ် သို့ တက်ခွင့်မပေးချေ။ သတို့သားက ချောနေသောဝါးပိုး ပိုင်းကိုပါအောင်မဆွဲနိုင်၍ ပရိသတ်တို့က ဟားတိုက်ရယ် မောကြရအောင် တမင် အကွက်ဆင်ခြင်းဖြစ်၏။
ထိုအခါမျိုးတွင် သတို့သား လူပျိုကာလသားများ က အနီးအနားရှိသစ်ပင်များကို ဆွဲပစ်ဖျက် ဆီးကြသည်။ သင်လာလျှင် ဆင်လမ်းရှိရမည်။ လမ်းဖွင့်ပေးကြဟူ၍ တောင်းဆိုကြသည်။ သီချင်းအားဖြင့်လည်း ဤသို့ ဆိုကြ လေသည်။
“အောင်းယဂေါက် ထီထုံးဖွန်ကောက်
နှင်းလန်အေး ယသာလမောက်(လာလာဝေး)”
အဓိပ္ပါယ်မှာ ဝါးကျည်ထောက်ကို ရအောင် မဆွဲနိုင်၍ စိတ်မကောင်းခြင်းကြီးတွေ ဖြစ်ရပါသည်။
“အောင်းယဂေါက် ထီထုံးလခေါ
နင်းလန်အေး ယဗားထိုင်ပလော် (လာလာဝေး)”
အဓိပ္ပါယ်မှာ ဝါးကျည်တောက်ကို တဖက်ကဆွဲ ထားသဖြင့် ဆွဲမရအဆုံး အားမတန် မာန်လျှော့၍ ပြန် ရပါတော့မည်။
ထိုသို့ သတို့သားကတဖက် သတို့သမီး အပျိုရံ တို့ ကတဖက် ဝါးကျည်တောက်ကို သူရကိုယ်ရ ဆွဲလု နေ ချိန်တွင် သတို့သမီးဖက်မှလူကြီးများက သတို့သား လူပျို ရံများအား အရက်ငှဲ့၍ တိုက်ကြရသည်။ သတို့သားနှင့် ပါလာသော လူကြီးများကလည်း တားဆီးသူ ပျိုမေတို့ အား တားကြေးများ တန်ရာ တန်ကြေးပေးရန် လမ်းဖွင့် ရန်တောင်းပန်ကြရသည်။ ထိုသို့အပြန်အလှန် ပေးယူကြ ပြီး ပျော်ရွှင်၍ တစ်နာရီကျော် နှစ်နာရီခန့် အကြာတွင် သတို့သားအား လမ်းဖွင့်ပေးလိုက်ကြသည်။
ဝါးဆစ်ပိုင်းခွဲ၍ ကွဲသွားသောအခါမျိုးတွင် လည်း ကောင်း၊ ဝါးကျည်တောက် ဆွဲ၍ရသောအခါ မျိုးတွင် လည်းကောင်း သတို့သားသည် အောင်ပွဲရ သူရဲကောင်း အလား ဝင့်ကြွားစွာ အိမ်ပေါ်သို့တက် သွားနိုင်လေပြီ။ ထိုသို့ အိမ်ပေါ်ရောက်နေစဉ် လှေကား အလယ်ဆင့်သို့ ရောက်သောအခါ အသင့် စောင့်နေသော အမျိုးသမီးက အသင့်ပြုလုပ်ထားသော တရော်ကင်ပွန်းရည်ဖြင့် ခေါင်းမှ လောင်းချလိုက်ရ၏။ ထိုအခါ သတို့သားမှာ ကိုယ်ခန္ခာ တစ်ခုလုံး တရော်ကင်ပွန်းရည်တို့ဖြင့် စိုရွှဲသွားလေ တော့၏။
သတို့သားအိမ်ပေါ်သို့ ရောက်သောအခါ အသင့် ထားရှိသော ရေအိုးမှရေဖြင့် စင်ကြယ်အောင် ရေချိုးပေး လိုက်ရသည်။ထိုအခါသတို့သမီးကကိုယ်တိုင်ရက်လုပ်ထားသော အမျိုးသားဝတ်စုံကို မင်္ဂလာသတို့သား အားထုတ်ပေး ပြီး ဝတ်ဆင် လဲလှယ်စေလေသည်။ ထို့နောက်အမျိုးသားဝတ်စုံဖြင့် သတို့သားက သတို့သမီး လက်ကိုဆွဲပြီး ပြင်ဆင်ထားသော မင်္ဂလာခန်းမတွင် ဝင် ရောက်၍ ယှဉ်တွဲထိုင်ရသည်။ သတို့သားက ညာဘက် တွင်ထားပြီး အမျိုးသမီးက ဘယ်ဘက်တွင်ထိုင်ရသည်။ သတို့သား၏ ဒူးတစ်ဖက်က သတို့သမီး၏ ဒူးတစ်ဖက် ပေါ် တွင်စတိသဘောဖြင့်တင်ထားလိုက်ရသည်။မိဘစုံ အပျို လူပျိုရံတို့ကလည်း ကပ်၍ထိုင်ကြရသည်။
အရှေ့ပိုးကရင်တို့ မင်္ဂလာဆောင်ရာတွင် ချည်ဖြူ ဖြင့် ကရင်အခေါ် ‘‘အောဟောက်ခိုင်စူး’’ ခေါ် လက်ချည် ခြင်း ကို ဦးစွာပြုရသည်။ သတို့သား သတို့သမီးရှေ့ ဒေါင်း လန်းတစ်ချပ်ပေါ်တွင် ကောက်ညှင်း ဖင်ချွန်၊ငှက်ပျောသီး၊ ထမင်းခုနှစ်ဆုပ်၊ ပန်းခုနှစ်ပွင့်နှင့် ချည်ဖြူများဖြန့်ခင်း ထားပြီး ထမင်းဟင်းစားသောက်ဖွယ်ရာများကို ထည့် ထား ရလေသည်။ ထို့နောက်အသက်ကြီးနေသော လူကြီး ရွယ်အို လင်မယားတစ်စုံက စားသောက်ဖွယ်များကို အနည်းငယ်စီ ထည့်၍ လက်ချည်ပေးပြီး ဆုတောင်းပေး ကြသည်။ ယင်းနောက် လက်ချည်ပေး၍ပြီးလျှင် သတို့သား နှင့် သတို့သမီးတို့က စားသောက်ဖွယ်များ အနည်းငယ်စီ နှိုက်၍ သုံးကြိမ် သုံးခါတိုင်တိုင် အပြန်အလှန် ခွံ့ကျွေးရ လေသည်။ထို့နောက်တွင် အပျိုလူပျိုရံတို့က ထမင်းဟင်း များကို သုံးလုတ်စီပြည့်အောင် စားသောက်ပြီး ဦးစွာပြီး သူက ကျန်သူများပေါ်တွင် ထမင်းများကို ကြဲဖြန့်၍ လက်ထပ်ပွဲကို အဆုံးသတ်လိုက်ကြတော့သည်။
သတို့သမီးနှင့်သတို့သားတို့ မင်္ဂလာလက်ချည်ပြုနေချိန်တွင် အပြင်ဖက်မှ နှစ်ဖက်သော ဧည့်သည်ပရိတ်သတ်များသီချင်းဆို၍ ကခုန်ပျော်မြူးကြသည်မှာ တမော တကောပင်ဖြစ်သည်။ အထူးသဖြင့် သတို့သားဖက်မှ အပျိုလူပျိုတို့က ကြေကွဲဝမ်းနည်း၍ နှမြောသော တေး သီချင်း များကို ဆိုတတ်ကြသည်။
‘‘ယဝိုမောင်းခွာ့ လအောနောင်းဂါ
အောလဟော ထိုင်ကဲနောင်ဝါ(လာလာဝေး)’’
ငါ့များ အပေါင်းအသင်းရယ်လို့ မရှိလှပါ။ ရှိတဲ့ တစ်ယောက်မှာလည်း ယခုတော့ သူ့ရဲ့ခင်ပွန်း ဖြစ်သွား လေပြီ။
‘‘ယဝိုဖောင်းခွာ့ ထိုင်ကဲနဝါ
ယအောလဟာ လမောက်ယသာ(လာလာဝေး)’’
ငါ့အပေါင်းအသင်းက သင့်ရဲ့ခင်ပွန်းဖြစ်ချေတော့ ငါ့မှာလွမ်းဆွေးရ၊ စိတ်မချမ်းမြေ့ရ ဖြစ်ရပါတယ်။
အချို့ကလည်းလာရောက်စဉ်က အပေါင်းအဖော် စုံလင်ပြီးအပြန်မှာ တစ်ယောက် လျော့သွား၍ ကြေကွဲ ဟန်ဖြင့်လည်း ဤသို့ သီချင်းဆိုကြသည်။
‘‘ဟဂယ်ကို တဝိုဖောင်းခွာ
ဘားအောကစ်ထော ကဲနဝါ(လာလာဝေး)’’
ဒို့တတွေက ဒို့ရဲ့အပေါင်းအသင်းကို ခေါ်လာ ကြ သည်။ ခုတော့ သူမရဲ့ခင်ပွန်းအဖြစ် ချန်ထား ခဲ့ရပြီ လေ။ အချို့ကလည်းသတို့သမီးချောမချော၊ လှမလှကို ကြည့်ရှု လို၍ သီချင်းဖြင့်လည်း ဤသို့ တောင်းဆိုပြသည်။
‘‘ယဝိုဖောင်း မူးအဝေါင်ဟီ
ဒါးဘားလားအမေ နောင်ထိ(လာလာဝေး)
ယဝိုဖောင်းမူး၊ ကဲပဝေ့
လဒါးဘား ဟတိုင်မောက်အေ့(လာလာဝေး)’’
ရုပ်ရည်လှပသောငါတို့ရဲ့ သူငယ်ချင်းဇနီးကို ခဏ မျှကြည့်လိုသည်။ငါတို့ရဲ့ သူငယ်ချင်း ဇနီးဟာ ဒို့သူငယ် ချင်းလည်း ဖြစ်နေပါပြီ။ မမြင်ရသမျှ မပြန်လိုတော့ ပါဟူ ၍ သီချင်းတို့ဖြင့် အော်ဟစ်ကခုန် ပျော်မြူးလျက် ရှိနေ ကြလေသည်။
မင်္ဂလာချည်ဖြူဖြင့် လက်ချည်မင်္ဂလာ ကျင်းပပြီး သောအခါ အချို့သော မိဘရှင်တို့က လယ်ယာ မြေ၊ ကျွဲ၊ နွား၊ရွှေငွေရတနာများကိုပရိတ်သတ်များရှေ့တွင်လက်ဖွဲ့ ပစ္စည်းအဖြစ် ပေးအပ်ကြေညာ အသိပေးလေ့ရှိသည်။ ကရင်လူမျိုးတို့မင်္ဂလာဆောင်ပွဲကိုထမင်း၊ဟင်းနှင့် ဧည့်ခံ ကျင်းပခြင်းအပြင်တူရိယာဝိုင်းများ၊ ရိုးရာအကဖြင့်လည်း ဖျော်ဖြေဧည့်ခံလေ့ရှိသည်။
