ကရင်အမျိုးသားနှစ်သစ်ကူးနေ့သည် မြန်မာနိုင်ငံကို ဗြိတိသျှ အုပ်စိုးစဉ်ကာလ ခရစ်သက္ကရာဇ် ၁၈၈၁ ခုနှစ်တွင် ခေတ်ပညာတတ် မျိုးချစ်ကရင်အမျိုးသားခေါင်းဆောင်ကြီးများ ဦးဆောင်ပါဝင်ဖွဲ့စည်း ခဲ့သောကရင်ဘာသာအားဖြင့် "ဒေါကလု"ဟုခေါ်သည့် ကရင်အမျိုး သားအဖွဲ့ကြီး၏ ကြိုးပမ်းမှုကြောင့် ပေါ်ပေါက်လာရခြင်းဖြစ်ပါသည်။ 

ကရင်နှစ်သစ်ကူးပွဲတော်သည်ရှေးပဝေသဏီနှစ်ပေါင်း များစွာ ကပင်ကျင်းပခဲ့ကြသည်။တစ်ခါတစ်ရံမှေးမှိန်၍ တစ်ခါတစ်ရံ စည်ကား လှ ၏။ အင်္ဂလိပ်ခေတ်တွင် ကံခေ၍ ကွယ်ပျောက်လုနီးဖြစ် ခဲ့ရသည်။ ဆင်းရဲလှ၍  စတိမျှသာ ကျင်းပရသော ဘဝနှင့်လည်း ကြုံခဲ့ရ၏။ ပဲခူး ဘုရင်မ ရှင်စောပုလက်ထက်က နှစ်သစ်ကူးပွဲတော် အလွန်စည်ကား ကြောင်းလူကြီးများပြောဆိုကြသည်ကိုကြားသိခဲ့ကြရသည်။ ထို့ကြောင့် ကရင်အမျိုးသားများသည် ကရင်နှစ်သစ်ကူး ပွဲတော်ကို ရှေးကကဲ့သို့ စည်ကားလှပအောင် ဖေါ်ထုတ်လိုကြ၏။ နိုင်ငံတော်က အသိအမှတ်ပြုသော ဂေဇက်ဝင်နိုင်ငံတော်အားလပ်ရက်အဖြစ်ရုံးများ၊ ကျောင်းများ၊ အလုပ်ရုံကြီးများ၊ ဘဏ်တိုက်ကြီးများ ပိတ်စေသော နိုင်ငံတော်အားရက်ဖြစ်စေလိုကြ၏။ ထို့ကြောင့် ကရင်နှစ်သစ်ကူး ပွဲတော်ကို ဖေါ်ထုတ်လိုကြသော နယ်များက ကရင်အမျိုးသား၊ အမျိုး သမီးတို့သည် မိမိတို့၏ ကိုယ်စားလှယ်၊မင်းတိုင်ပင် အမတ်များကို ဆောင်ရွက်ပေးရန် မေတ္တာရပ်ခံကြသည်။