၂၀၁၇ -၂၀၁၈ ဘဏ္ဍာရေးနှစ်အတွင်း လုပ်ငန်းဆောင်ရွက်ချက်

၁။      စာအုပ်စာတမ်းနှင့် မှတ်တမ်းများထိန်းသိမ်းခြင်း

          (က)    တိုင်းရင်းသားမျိုးနွယ်စုများနှင့်သက်ဆိုင်သည့် သုတ၊ ရသနှင့် သမိုင်းကြောင်းဆိုင်ရာ ကဗျာ၊ ဆောင်းပါး၊ ဝတ္ထုစသည့် စာအုပ်စာတမ်းများ စုဆောင်းထိန်းသိမ်းထားရှိ နိုင်ရေးအတွက် ဌာနပိုင်စာကြည့်တိုက်တစ်ခု တည်ထောင်ထားရှိရန် စာအုပ်များ ဝယ်ယူစုဆောင်းခြင်း၊ တိုင်းရင်းသားမျိုးနွယ်စုများ၏ ယဉ်ကျေးမှုဓလေ့ထုံးတမ်း နှင့်ရိုးရာဓလေ့ဝတ်စားဆင်ယင်မှုဆိုင်ရာ ဓာတ်ပုံများ၊ ရိုးရာအကပဒေသာ Video ဖိုင်များစုဆောင်းခြင်းနှင့် တိုင်းရင်းသားလူမျိုးများ၏ ယဉ်ကျေးမှုဓလေ့ထုံးစံအရ ဆောင်ရွက်သည့် အခမ်းအနားများ၊ နေ့ထူးနေ့မြတ်များနှင့် ပတ်သက်၍ စုစည်း မှတ်တမ်းတင်ခြင်းတို့ကို ဆောင်ရွက်ခဲ့ပါသည်။

၂။       တိုင်းရင်းသားစာပေနှင့် ဘာသာစကားများထိန်းသိမ်းခြင်း

          (က)    ထောက်ပံ့ကြေး တစ်လလျှင် ကျပ် ၃၀၀၀၀ ဖြင့် တိုင်းရင်းသားစာပေ ဘာသာစကား သင်ကြားပေးနေသော တိုင်းရင်းသားဘာသာသင် ဆရာ၊ ဆရာမများအား အခြေခံ ပညာကျောင်းများတွင် နေ့စားလပေးဆရာ၊ ဆရာမများ (Teaching Assistant) အဖြစ် ခန့်ထားနိုင်ရေးအတွက် ပညာရေးဝန်ကြီးဌာနနှင့် ညှိနှိုင်း ဆောင်ရွက်ခဲ့ရာ ဆရာ၊ ဆရာမ ၅၁၆၁ ဦးကို ပညာရေးဝန်ကြီး ဌာနက လက်ခံခန့် ထားပေးနိုင်ခဲ့ခြင်းဖြင့် တိုင်းရင်းသားတို့၏ စာပေနှင့်ဘာသာ စကားများ ရေရှည်တည်တံ့စေရေးအတွက် ထိန်းသိမ်းရာတွင် ကူညီပံ့ပိုးပေးနိုင်ခဲ့ပါသည်။

          (ခ)      စစ်ကိုင်းတိုင်းဒေသကြီးအတွင်း ဟုမ္မလင်းမြို့နယ်၊ ဗန်းမောက်မြို့နယ်နှင့် ပင်လယ်ဘူး မြို့နယ်တို့ရှိ အခြေခံပညာကျောင်းများတွင် သျှမ်းနီတိုင်းရင်းသား ဘာသာသင်ကြား နိုင်ရေး၊ ရန်ကုန်တိုင်းဒေသကြီး လှည်းကူးမြို့နယ်အတွင်းရှိ အခြေခံပညာကျောင်း ၃ ကျောင်းတွင် အရှိုချင်းဘာသာ သင်ကြားနိုင်ရေးနှင့် ပြဌာန်းစာအုပ်အတည်ပြု ပုံနှိပ်ပေးနိုင်ရေးတို့အတွက်လည်း ပညာရေးဝန်ကြီးဌာနနှင့် ပေါင်းစပ်ညှိနှိုင်းပေး ခြင်းကို ဆောင်ရွက်နိုင်ခဲ့ပါသည်။

          (ဂ)     တိုင်းရင်းသားမျိုးနွယ်စု အသီးသီး၏ စာပေနှင့်ဘာသာစကားများ ထိန်းသိမ်းရေးကို ရှေးရှုလျက် နွေရာသီကျောင်းပိတ်ချိန်တွင် အခြေခံပညာကျောင်းများ၌ စာပေနှင့် ယဉ်ကျေးမှု သင်တန်းများဖွင့်လှစ်နိုင်ရန် တိုင်းဒေသကြီးနှင့်ပြည်နယ် အသီးသီးရှိ စာပေနှင့်ယဉ်ကျေးမှုအသင်းအဖွဲ့များနှင့် ပြည်ထောင်စုအစိုးရအဖွဲ့ရုံး၊ နေပြည်တော် ကောင်စီ၊ တိုင်းဒေသကြီးနှင့် ပြည်နယ်အစိုးရအဖွဲ့များစသည့် ဆက်စပ်ဌာန အဖွဲ့အစည်းတို့အကြား ညှိနှိုင်းပေးနိုင်ခဲ့ပါသည်။

          (ဃ)    ခေါင်ဆိုစာပေနှင့် ရိုးရာယဉ်ကျေးမှုအသင်း ဖွဲ့စည်းနိုင်ရေး၊ ငေါင်ချင်းစာပေ နှင့် ယဉ်ကျေးမှုအသင်း ဖွဲ့စည်းနိုင်ရေးအတွက် ဆက်စပ်ဝန်ကြီးဌာနများသို့ ပေါင်းစပ် ညှိနှိုင်းခဲ့ပါသည်။

          (င)      တိုင်းရင်းသားလူမျိုးများ၏ အခွင့်အရေးကာကွယ်စောင့်ရှောက်သည့်ဥပဒေကို တိုင်းရင်းသားဘာသာ ၄၄ မျိုးဖြင့် ဘာသာပြန် ဖြန့်ဝေနိုင်ခဲ့ပါသည်။

          (စ)     မြန်မာဘာသာ စကားမှသည် တိုင်းရင်းသားဘာသာ စကားဆီသို့ စကားပြော စာအုပ် ပြုစုခြင်း၊ တိုင်းရင်းသားများ၏ ရိုးရာပုံပြင်များနှင့် စကားပုံ၊ စကားထာများကို စုဆောင်း၍ စာအုပ်ပြုစုခြင်းတို့ကိုလည်း ဆောင်ရွက်ခဲ့ပါသည်။

၃။      ယဉ်ကျေးမှုအမွေအနှစ်များနှင့် ဓလေ့ထုံးစံများထိန်းသိမ်းစောင့်ရှောက်ခြင်း။

          (က)    ဝန်ကြီးဌာနရုံးအဝင် Lobby တွင် မြန်မာနိုင်ငံ၏ အဓိကလူမျိုးစုကြီး ၈ မျိုး၏ ဝတ်စားဆင်ယဉ်ထုံးဖွဲ့မှုများ၊ အသုံးအဆောင်များနှင့် ရိုးရာတူရိယာ ပစ္စည်းများကို ရှာဖွေစုဆောင်းကာ အများပြည်သူ လေ့လာသိရှိနိုင်စေရန် ခင်းကျင်းပြသခြင်းကို ဆောင်ရွက်ထားရှိခဲ့ပါသည်။

          (ခ)      ၁၀-၂-၂၀၁၈ ရက်နေ့မှ ၁၂-၂-၂၀၁၈ ရက်နေ့ထိ မန္တလေးတိုင်းဒေသကြီး မန္တလာသီရိ အဆင့်မြင့် အားကစားကွင်း၌ ကျင်းပခဲ့သည့် ၂၀၁၈ ခုနှစ် (၇၁) နှစ်မြောက် ပြည်ထောင်စုနေ့အထိမ်းအမှတ် သတ္တမအကြိမ် တိုင်းရင်းသားလူမျိုးစုများ စျေးရောင်း ပွဲတော်တွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာန၏ တိုင်းရင်းသားရိုးရာ ဝတ်စားဆင်ယင်မှုပြခန်းအတွင်း တိုင်းရင်းသား ရိုးရာဝတ်စုံများ ပြသနိုင်ရန် ပူးပေါင်း ပါဝင်ဆောင်ရွက်ပေးခဲ့ပါသည်။