၂၀၁၆-၂၀၁၇ ဘဏ္ဍာနှစ် အမျိုးသားစီမံကိန်း လုပ်ငန်းစဉ်

(က)    တိုင်းရင်းသားအခွင့်အရေးများ ကာကွယ်စောင့်ရှောက်သည့် နည်းဥပဒေ ပီပြင်စွာ ပေါ်ပေါက် လာရေးအတွက် ဆက်စပ်ပတ်သက်သူများအားလုံး၏ ပူးပေါင်းပါဝင်မှုဖြင့် ဆက်လက်ကြိုးပမ်း ဆောင်ရွက်သွားမည်။

( ခ )     ပြည်နယ်နှင့်တိုင်းဒေသကြီးများ၌ ဖွင့်လှစ်ရန်ကျန်ရှိနေသည့် တိုင်းရင်းသားလူမျိုးများရေးရာ ဝန်ကြီးဌာန၏ ဦးစီးဌာနရုံးများ ဖွင့်လှစ်နိုင်ရေးအတွက် ကြိုးပမ်းသွားမည်ဖြစ်ကာ ကရင် ပြည်နယ်၊ ကယားပြည်နယ်၊ ချင်းပြည်နယ်၊ မွန်ပြည်နယ်၊ ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးများတွင် ၂၀၁၇-၂၀၁၈ ဘဏ္ဍာရေးနှစ်အတွင်း ဦးစီးဌာနရုံး အဆောက်အအုံသစ်များ ဆောက်လုပ်သွားမည်။

( ဂ )   တိုင်းရင်းသားဘာသာစကား သင်ကြားပေးနိုင်မည့် ဒေသခံတိုင်းရင်းသား ဆရာ၊ ဆရာမ များအား အခြေခံပညာကျောင်းများတွင် Teaching Assistant အဖြစ် ခန့်ထားပေးနိုင်ရေး အတွက်လည်း ပညာရေးဝန်ကြီးဌာနနှင့် ညှိနှိုင်း၍ ဆောင်ရွက်သွားမည်။

(ဃ)   ပျောက်ကွယ်လုနီးပါးဖြစ်နေသည့် ထနော့၊ သက်နှင့် ယင်းနက် စသည့် တိုင်းရင်းသား မျိုးနွယ်စုများ၏ အယူဝါဒနှင့် ဓလေ့ထုံးစံများ၊ ပြောဆိုသုံးနှုန်းသည့် ဘာသာစကား၊  ပြုမူ နေထိုင်ပုံနှင့် အသက်မွေးဝမ်းကျောင်းမှုပုံစံတို့အား ရုပ်သံမှတ်တမ်းတင် ထိန်းသိမ်းခြင်း လုပ်ငန်းများကိုလည်း ၂၀၁၇-၂၀၁၈ ဘဏ္ဍာနှစ်အတွင်းဆောင်ရွက်သွားရန် စီစဉ်ထားရှိမည်။